Meeqqat inuusuttuaqqallu atugarliortutut nalilerneqartut
Meeqqat sisamaagaangata ataaseq sapaatip-akunneri tamaasa niaqorlullunilu sinissaaleqisarpoq. Meeqqat pingajorarterutaat uumisoqqajaasarput, tallimaagaangatalu ataaseq sapaatip-akunneranut ataasiarluni nikallungarujussuartarluni. Meeqqat atuarfianni atuartut peqqissusaannik kulturimut ilinniartitaanermullu pisortaqarfiup KIIIP-ip misissuisitsinerata inernerata tamanna takutippaa.
Inerniliineq naapertorlugu meeqqat inuusuttuaqqallu taakku atugarliortutut inuunerminnilu naalliuuteqartutut nalilerneqarput. Tamatuma paasinarsisippaa, nunanut allanut naleqqiussissagutta kalaallit inuusuttuaqqat ikittuinnaat inuunerminnik naammagisimaarinnissimassasut.
Niviarsiaqqat 15-it 17-illu akornanni ukiullit 22 %-iisa inuunertik naammaginngilaat, nukappiaqqat 13 %-ii aamma taama misigisimapput. Niviarsiaqqat amerlanerusut taama misigisimanerannut peqqutaatinneqarpoq, nukappiaqqat misigisimasatik pillugit oqaluttuassallutik tunuarsimaarnerusarnerat.
Inuusuttuaqqat 1994-imit 2002-mut inuunerminnik naammaginnippallaanngitsut amerliartulersimapput, iluarisimaarinnittullu ikiliartulersimallutik.