Inuit aqqi pillugit inatsisissaq nunatsinnut attuissanngikkallarpoq
Inuit aqqi pillugit inatsit nutaaq Folketingimi aqagu taasissutigineqarpat Nunatsinni inuit aqqi eqqorneqassanngikkallarput. Danmarkimi inuit aqqi pillugit inatsit Nunatsinni aamma naliginnaasumik atuuttarpoq.
Danmarkimi inuit aqqi pillugit inatsisip nutaap kinguliaqut inunnit 2000-inik amerlanerusunit pigineqarpat kikkunnilluunniit kinguliarineqalersinnaanera periarfissaqartilissavaa. Taamaalilluni inuit amerlanerit siunissami Jensenimik allatulluunniit kinguliaquteqalersinnaalissallutik.
Siullermik siunnersuutigineqarsimagaluarpoq inuit 1000-t assigiimmik kinguliaqaraangata tamanna atuussinnaassasoq, danskilli akimarngit akornanni nuannarineqarsimanngilaq namminneq ilaqutariinni atit kinguliaqutillu annaanissaat annilaangagalugu.
Nunatsinnili inuit nutaanerusumik killersuinnginnerusumillu atilersorneqarsinnaaneri ammaaffigineqarsinnaavoq. Taamaaliortoqassappat inuit aqqi pillugit inatsisip maani nunami atuutinneqarnissaanik siunnersuuteqartoqartariaqarpoq malittarisassallu nunatsinnut tulluarsartariaqassallutik.
Nunatsinni inuit kinguliaqutimminnik allannguerusullutik qinnuteqaataat Naalagaffiup sinniisuanit suliarineqartarput.
Allaffimmi pisortaq Annette Scheelip ilisimatitsissutigaa ukiuni kingullerni tallimani inuit atimminnik allanngortitserusuttut 220-usimasut.