Greenland Tourism-imi siulersuisuni ilaasortaq tunuarpoq
Greenland Tourism-imi siulersuisuni ilaasortaq Bjarne Eklund, pissutsinik naammaginnikkunnaarluni, siulersuisunit tunuarluni nalunaarpoq. Bjarne Eklund-ip GT-mi siulersuisuni ilaasortatut tunuarniutini Naalakkersuisut siulittaasuanut Hans Enoksen-imut allakkatigut nassiussimanerarpaa.
Greenland Tourism-imi sivisuumik eqqissiviilliortoqarluni pisuutitsisaqattaannerit ingerlanneqarsimapput, ilaatigut aalakkuttoqartarsimaneranik kiisalu ilaquttanut namminerlu qanigisanut suliassanik tunniussuisarsimanernik pisuutitseqattaannerit ingerlanneqartarsimallutik.
Pisuutitsinerit Greenland Tourism-ip siulittaasuanut Flemming Nicolaisen-imut kiisalu Greenland Tourism-ip pisortaanut Stig Rømer Winther-mut sammitinneqartarsimapput.
Kina-mi ataatsimiinnerup nalaani, Flemming Nicolaisen aalakoorsimaneragaavoq, tamannali Flemming Nicolaisen-ip ilumuunnginnerarpaa, pisimasorlu nassuiaramiuk, oqarpoq timmisartoreersimanerup kingorna inuummarlussimaneq pissutaasimasoq.
Pisortaq Stig Rømer Winther, nuliaminik atorfinitsitsisimasutut pisuutinneqarpoq, taamaattoqarneralu pisortap ilumuunnginnerarpaa. Stig Rømer Winther oqarpoq, siulersuisuni ilaasortat tamarmik akuerisaanik nuliani suliakkinneqarsimasoq.
Bjarne Eklund-ip Greenland Tourism-imi pissutsit ajuusaarnarnerarpai.
- Greenland Tourism-imit malersugaasutut qunusiaasutullu misigisimasimavunga Bjarne Eklund oqarpoq.
Greenland Tourism-ip pisortaa Stig Rømer Winther, oqarpoq siulittaasorlu marluullutik malersorneqartutut misigisimallutik, taamatullu Bjarne Eklund-imit pisuutinneqarnertik eqqartuussivik aqqutigalugu misissortinniaritsik oqaatigaa.
Greenland Tourism Namminersornerullutik Oqartussanit pigineqarpoq, ajornartorsiutillu ilisimaneqarlutik. Bjarne Eklund-ip Greenland Tourim-imi siulersuisunit tunuarneranut atatillugu, GT-mi siulittaasoq Flemming Nicolaisen, Johan Lund Olsen-imut sapaatip akunnerani kingullermi oqaatsitigut nassiuiaateqarsimavoq.
- Tunuarniuteqarnera tusaatissatut tiguara. Taamatut eqqissiviilliortoqarnera takornariaqartitsinermut ajoqusiisinnaavoq, neriuppungalu taamatut pisoqarnera maannakkut unissasoq, Johan Lund Olsen oqarpoq.
Naalakkersuisut allattoqarfianni pisortaq, Jens K Lyberth oqarpoq, Greenland Tourism-imi pisut ilisimagitik, tunuarniuteqarnerlu tusaatissatut tigunerarpaat. Siulersuisutut tunuartoq taarserneqassanersoq, ulluni qaninnerni ataatsimiissutigineqassasoq aamma oqarpoq.