Eqqissiviiliortitsinerit politiit ulapputigisimaqaat
Nunarput tamakkingajallugu sapaatip akunnerata naanera nalinginnaakannersumik politiit ingerlasimanerarpaat. Nalinginnaasutut oqaatigineqarsinnaanerpormi:
Illoqqortoormiuni politiit ulapaarsimapput. Politeeqarfimmi pigaartoq Eigil Lyberth oqarpoq, imigassartorsimalluni biilertoq aalakoortorpaalussuillu tallimammgormat isumagisariaqarsimallugit, kiisalu taakku saniatigut persuttaasoqarsimasoq.
Arnaq 25-inik ukiulik angutaamminit 30-inik ukiulimmit kiinnamigut ima persuttarneqarsimatigaaq napparsimmavimmukaanneqartariaqarsimalluni. Arnarli aqaguani angerlartinneqarsinnaasimavoq.
Tasiilami Sisimiunilu politiit kamaattunut aalakoortunullu arlalinnut aamma orniguttariaqarsimapput. Sisimiuni politeeqarfiup pisortaa, Hans Falck-Petersen, oqaluttuarpoq, taavani imerniartarfiit ilaanni eqqissiviilliorneq ima sakkortutigisimasoq, politiit ornigummata politiit biiliata igalaava aserorneqarsimalluni.
Nuummi politiit pisortaat, Bent Heisselberg, oqaluttuarpoq, Nuummi sapaatip akunnerata naanerani silaginnera pissutigisimagunarlugu inuit aalakoortut ikigisassaanngitsut aamma politiit isumagisariaqarsimavaat.