Politeeqarfiit passililiortiternerit ulapputigaat
Nunanut allanut angalanissamut piareerpit ? Passeqarpit imaluunnit passit atorsinnaava ?
Aasarissileruttorpoq, nunanullu allanut angalaniat imaaginnavillutik. Aallartinnanili isumageqqaagassat pingaarnerit ilagaat passi, passitaarniallu politeeqarfinni maanna ulapputigineqaleruttorput.
- Ferierfiup naligigaa allaffitsinni malugisinnaalluarparput, passitaarniarlutik qinnuteqartut nalinginnaasuk 100-it missaanniittartut aasaanerani marloriaammik amerlisarmata. Politimestereqarfimmi immikkoortortami pisortaq Tenna Birk Berhelsen taama oqarpoq.
Politimestereqarfimmi ulloqeqqata kingorna inunnik ulikkaavittarpoq, allaallu allaffitta silataani majuartarfinnut pillutik tulleriiaarlutik utaqqerrattarlutik.
- Tamaasali angumerisarpavut. Tenna Birk Berthelsen erseqqissaavoq.
Ajoraluartumilli innuttaasut piffissaq kingullerpaaq atorlugu passitaarniarlutik saaffiginnittartut arlaqarput, passillu sapaatip-akunneri pingasut angullugit suliarineqarsinnaallutik.
- Passitaarniartut piffissaqarluartitsillutik aggertartuuppata qujanassagaluaqaaq. Tenna Birk Berthelsen oqarpoq.
Aammali passitaarniaraanni sillimaffigisassat eqqaamaniagassallu arlaqarput. Assit nutaat kinaassutsimullu uppernarsaatit nassartariaqarput, nasaqarluni assilittoqarsimappat atorsinnaanavianngilaq, aningaasanillu nassarluni takkuttariaqarluni – passi ataaseq 400 koruuninik akeqarmat. Meeraqaraannili qanoq iliortariaqarpa ?
- Siornatigut imaassimagaluarpoq, angajoqqaat meeqqatik passiminnut ilannguttarsimallugit. Taamaaliussaarpugulli, maanna meeqqat tamarmik immikkut passeqartussaatitaammata. Tenna Birk Berthelsen nassuiaavoq.
Angajoqqaalli passiminnut meeqqatik ilanngussimappatigik naalagaaffiit ilaanni suli atorsinnaapput, naalagaaffiilli ilaat sillimaniarlutik maleruagassanik sukaterisimammata, soorlu USA-mut iserniaraanni meeqqat tamarmik immikkut passeqartussaatitaapput. Meeqqat passitaartinniaraanni uppernarsaatit assillu aamma naammanneq ajorpoq, assersuutigalugu isaasa qalipaataat takuneqartariaqartarmata politimestereqarfimmut ilagalugit saaffiginninnissaq pisariaqartarluni.
- Soorunami maleruagassanik allanngortitsisoqaraangat aamma ilisimatinneqartarpugut, kisianni aallartinnani nunani allani sinniisoqarfimmut imaluunnit angalatitsivinnut paasiniaasarnissaq inassutiginarpoq. Tenna Birk Berthelsen erseqqissaavoq.
Passit Kalaallit Nunaannik imaluunnit Danmarkimik allassimasut pineqarsinnaapput, tamarmillu ajornaquteqanngitsumik atorneqarsinnaallutik.
Taamatuttaaq passimik piffissaq kingulleq atorlugu qinnuteqartoqaraangat sapinngisamik naammassiniarneqartarpoq, pisariaqavitsillugulu soorlu Danmarkikkoortoqassatillugu ilaatigut Danmarkimi mittarfeqarfimmi politiinut naammassiunneqarsinnaalluni.