Nalliuttut akissarsisoqarneralu politiinik ulapaartitsipput
Pisarnertut angerlarsimaffinni eqqissiviilliornerit amerlavallaarsimapput, politiillu sapaatit akunnerata siuliani 25-eriarlutik eqqissisaajartortaqariaqarsimapput. Nuummi aamma aserorterinerit ajornartorsiutaasimapput, sapaatit akunneranilu tassani politiit aserorterinerit tallimat suliarisimavaat.
Sapaatit akunnerata ingerlanerani persuttaasoqarneranik suliat katillugit tallimat suliarineqarsimapput tillinniartoqarneranillu suliat katillugit 15-iusimallutik. Kingullertut taaneqartumi ilaatigut aningaasanik oqarasuaatinillu angallattakkanik tillittoqarsimavoq. Taamaammat tillitanik pisisoornaveersaartoqartariaqarpoq, pingaartumik Sony Ericsson Xperiamik Iphone 4-milluunniit akikitsumik uppernarsaatitaqanngitsumillu neqeroorfigineqassagaluaruit.
Kommunip allaffia peqquserluttoqarsimaneranik aamma nalunaaruteqarsimavoq, angut allaasuusaarluni isumaginninnikkut ikiorsiissutinik 800 kr.-it missaannik pissarsisimammat. Pinerluttoq ilisarineqarsimavoq suliarlu suli misissuiffigineqarluni.