Nunaqarfinni nakorsaataasivinni sulisut atugarisaat pitsanngorsagassaaqisut, SIK-p ataatsimeersuarnerani Inunnik isumaginnittut, Peqqinissaqarfimilu sulisut peqatigiiffianit saqqummiunneqarput, aamma inulerisut ilinniarsimanngitsut allat atugarisaat pitsanngorsagassaaqisut, IIPSP-p siulittaasuata Marie Lyberth-ip oqarpoq.
-Nunaqarfinni nakorsaataasivinni sullissisut annertoorujussuarmik ukiorpaalunni atugarisaannut tunngatillugu annikitsunnguanik pitsanngorsaavigineqartarsimapput. Kisianni massakkut SIK-p ataatsimeersuarnerani pitsanngorsaatissatut pingaarnertut nunaqarfinni nakorsaataasivinni sullissisisut atugarisaat pitsanngorsarniarpagut, Marie Lyberth oqarpoq.
Assersuutigivaa toqungasulerinermut tapit, akuttaske-mik pikkorissarsimasunut tapit, taavalu inuttussuseq aallaavigalugu aningaasarsiaqartinneqartarnerat piumasarivaat peerneqarnissaat.
Aamma angerlarsimaffinni ikiortit immikkut isumaqatigiissuteqarnissaat siunniuppaat taavalu innarluutilinnik sullissisut immikkut isumaqatigiissuteqarnissaanik tunngasunik siunniussaqarlutik.
-Taavalu portørit oqaluttaasarnermut tapinik, toqungasulerinermullu tapinik tunineqarnissaannik aamma siunnersuuteqarpugut, Marie Lyberth oqarpoq.
Inunnik isumaginnittut peqqinnissaqarfimmilu sulisut peqatigiiffianit neriuutigineqarpoq piumasatik aappaagumut isumaqatiginninniartoqalerpat ingerlanneqarumaartut.
Inunnik isumaginnittut peqqinissaqarfimmilu sulisut peqatigiiffiat IIPSP soqutigisaqaqatigiiffittut SIK-mut atavoq.