Jess G. Berthelsen: Nunanut allanut suliffissuarnik nuussuineq unitsinneqartariaqarpoq
Ullormiit ullormut Royal Greenland-ip sulisunik angerlartitsisarnera unitsinneqartariaqartoq, nunanullu allanut suliffissanik nussuineq unitsinneqartariaqartoq, Sulinermik inuussutissarsiuteqartut kattuffiata ataatsimeersuarnera ullumi aallartimmat, siulittaasoq Jess G Berthelsen ilaatigut taamak oqaaseqarpoq.
Sulisartut nunatta ataqqinaatsigai, sulinermik inuussutissarsiuteqartut kattuffiata SIK-p ataatsimeersuarnera taamak qulequtaqarpoq. Taamaammat Royal Grenland-ip sulisunik ullormiit ullormut angerlartitsiinartarnera unitsinneqassasoq, nunanullu allanut suliffissanik nussuineq unitsinneqassasoq, naalakkersuisunut saaffiginnissutigineqassasoq, SIK-p siulittaasua Jess G Berthelsen ataatsimeersuaqataasunut 43-nut neriorsuivoq.
-Taamatut suliffissuit matuneri aammalu nunanut allanut noorarneri inuiaqatigiinnut kalaallinut annertoorujussuarmik eqquisussaavoq, allaat nunap unittuuinneranik kinguneqarsinnaalluni. Taamaattumik isumaqarpunga pingaaruteqartorujussuaq naalakkersuisut taanna erngerlugu isummerfigissagaat, aningaasaliinikkut imaluunniit Royal Greenland-imut minnerusumik piumasaqaateqarnikkut Royal Greenlandimi tisanerit allallu ingerlatileqqinngippata, taava erngerlutik suliffissanik allanik ataavartunik maani nunatsinni pilersitsisariaqarput. Taamaanngippat nunatta aningaasarsiornikkut unittuuinnissaa ersissutigaara, Jess G. Berthelsen oqarpoq.
Jess G. Berthelsen isumaqarpoq Naalakkersuisut Royal Greenlandip namminersortuunera utoqqatsissutigisaraat.
-Piginnittut Namminersornerullutik Oqartussat sukkulluunniit piumasaqarsinnaapput immikkut ittumik Royal Greenlandimi ataatsimeersuartoqarnissaanik. Tassani ataatsimeersuarnermi piumasaqarsinnaapput, Royal Greenland-i imatut imatullu ingerlasariaqartoq, sapinngisamik nunatsinni tunisassiorfiit ingerlatinneqarnissaat siunertaralugu, Jess G. Berthelsen oqarpoq.
Tamannali qulakkeersinnaanagu ilanngullugu oqaatigaa, naalakkersuisulli soqutigissagaluaraat isumaqarpoq, aalisakkanik aalisakkerinerlu maani nunatsinni annikillisarneqarsappat, taava nunatta karsianut mikinngitsumik eqquisussaammat.
Jess G Berthelsen ilanngullugu oqarpoq Royal Greenland-ip pujoorivia Glyngørimiit Polen-imut nuunnagu nunatsinnut nuuneqarsimasariaqaraluartoq. Piginnittullu Namminersornerullutik oqartussat piumaffigineqartussanngorput suliffinnik piorsaaneq nunatsinni ingerlanneqaqqullugu aalisakkat nioqqutissiarineqarneri eqqarsaatigalugit.