Nunatta Nunavullu akornanni suleqatigiinnerulernissaq anguniarneqarpoq
Nunarput Canadallu akornanni suleqatigiinnerulernissaq anguniarlugu Inuit Siunnersuisoqatigiivinik taallugu, nunat akornanni pilersitsisoqarnialersoq, Inatsisartut Nunanut Allanut Sillimaniarnermullu Ataatsimiititaliaata USA-mi Canadamilu angalareernermi kingorna anguniarlugu oqaatigaa.
Inatsisartuni Nunanut Allanut Sillimaniarnermullu Ataatsimiititaliaq USA-mut Canadamullu angalaqqammerpoq. Canadamut angalanerminni ataatsimiititaliap Nunavumi Iqalunni naalakkersuisut naapeqatigaat, angalanermullu peqataasoq Atassummeersoq Ellen Christoffersen angalaneq pissarsilluarfigalugu oqarpoq.
-Isumaga naapertorlugu ajunngiivissumik pissarsiffigivarput. Aamma takusinnaavarput assigiinngitsorpassuartigut soorlu inunnik isumaginninnikkut avatangiisikkut piniarnikkullu atugassarititaasunut tunngasunik aallerfigisinnaallugu. Ataatsimiititaliamilu isumaqatigiippugut suliap ingerlatiinnarneqarnissaa, Ellen Christoffersen oqarpoq.
Inuit Siunnersuisoqatigiivinik ukiumut ataasiarlutik naapittartussanik pilersitsinissaq anguniarneqarpoq, Nunavumili naalakkersuisut nunanut allanut tunngassuteqartut suli tigunnginnamikkit tunuarsimaarfigaat.
-Orniginartippaat, kisianni nunanut allanut tunngassuteqartut suli Nunavup namminneq akisussaaffigilersimannginnamikkit ilaatigut imaasiallaannaq isumaqatigiissummik pilersitsinissaq orniginaartinneqarpallaanngitsoq, kisianni suleqatigiinnissaq orniginartinneqarpoq. Taamaammat ataatsimiititaliami isumaqatigiippugut suliaq ingerlateqqinneqassasoq malinnaaffigineqassasorlu, Ellen Christoffersen oqarpoq.
Tamannali uniffiginagu ataatsimiititaliap suliaq ingerlatiinnarniarpaat.
- Isumaqatigiissutigaarput Inatsisartut siulittaasoqarfiannut ataatsimiititaliaminngaanniit allagaqarniarluta, innersuussuteqarluta Nunavumi inatsisartut siulittaasoqarfianut aamma allagaqassasut, paasiniarlugu qanoq isumarput taanna pisortatigoornerusumik ingerlanneqarnissaa piviusunngortinniarneqarsinnaanissaalu isumaqarfigineqarnersoq, Ellen Christoffersen naggasiivoq.
Siunnersuisoqatigiiffik nunat akornanni suleqatigiissutigineqarsinnaasunik siunnersuisassapput, soorlu aalisarnermut inunnillu isumaginninnermut tunngsasunik, siunnersuisoqatigiiffillu ukiup ataatsip ingerlanerani pilersinneqarumaartoq neriuutigineqarpoq.