Naalakkersuisoq: Inatsit nutarterniarlugu suliniuteqartoqarpoq
Unammilleqatigiinnermut Inatsit 1992-imeersoq nutartertariaqalivimmat ullutsinnut naleqqussakkamik inatsisissatut siunnersuummik Naalakkersuisut Inatsisartunut aappaagu upernaakkut saqqummiussissasut, Inuussutissarsiornermut naalakkersuisoq Johan Lund Olsen oqarpoq.
- Unammilleqatigiinneq pillugu inatsisip allanngortinnissaa piffissanngorpoq, allanngortinnissaanullu sulineq aallartereerpoq. Aamma maanna allanngortinniarneqalerneranut pissutaaqataavoq, inuussutissarsiutitigut siuarsaaniarnermi suliniutit ukiortaamit aallartinneqarmata. Johan Lund Olsen nassuiaavoq.
Unammilleqatigiinnermut inatsit 1992-imeersoq Danmarkimi inatsisit assiliinnangajallugit suliaavoq. Taamaattumik Danmarkimi nunatsinnilu niuernermi pissutsit assigiinngimmata inatsisip nutarternissaa pisariaqalivissoq, Unammilleqatigiinnermut Ataatsimiititaliaq Qaqortumi maajip 26-ani ataatsimiinnermini naliliivoq.
Ullumikkut inatsit atuuttoq naapertorlugu suliffeqarfiit qanorluunnit ingerlatsisinnaatitaapput, sallersaasutut inissisimanerminnik atornerluinngikkunik.
Taamaattumik Ataatsimiititaliaq isumaqarpoq, pifissanngortoq unammillernissaraluamik killiliisunik inerteqqusiornissaq, taakkulu akuerineqariarunik ingerlaannaq atulertassasut, ullumikkutut ataatsimiititaliaq nammineerluni iliuuseqanngikkaangat killilersuiniartoqartarunnaarluni. Taamaattumik inatsimmik nutarterinissamik pisortanut 2002-mili siunnersuuteqarsimapput. Inatsisissatulli siunnersuut atorfilittanit ilusilersorneqarluni maanna suliarineqaleruttortoq Johan Lund Olsen erseqqissaavoq.
- Suliassaq imaannaanngitsuummat annertungaatsiarlunilu peqqissaaruttariaqarpoq, aamma utaqqisikkallalaartariaqarsimavarput, inuussutissarsiutitigut siuarsaaniarluni aaqqissuusseqqinneq ukiortaamit aallartinneqartoq aallarteqqaalaartariaqarsimagatsigu. Naalakkersuisoq erseqqissaavoq.
Johan Lund Olsenip aamma erseqqissaatigaa, inatsisip nutarteriffiginiarneranut atatillugu attuumassutillit suleqatiserineqarnissaat pilersaarutaasoq.
- Inatsisit pioreersut allanngortiterniaraangatsigit, atorfilittat, kattuffiit susassaqartullu peqataaffigisaannik suliaqartitsisoqartarpoq. Aamma matumani taamaaliortoqassaaq, misilittakkallu nalilersorneqareerpata allannguutissatut siunnersuutit Naalakkersuisunit akuerineqariarpata Inatsisartunut saqqummiunneqassapput. Johan Lund Olsen oqarpoq.
