Sineriak tamakkerlugu meeqqat ulluanni meerarpassuit assigiinngitsunik sammisassaqartinneqarput. Meeqqat ilaat tunisipput, aammali meeraqarpoq tunissutissaanngitsunik kissaateqartut. Ullutsinni meeqqat suna kissaatigineraat, radioaviisimit paasiniarparput, Nuummilu Qorsussuarmi 6. b-mi atuartut apersorneqarput.
Lars Joorup kissaatigaa Nuummi timmisartoqarfiup allineqarnissaa naluttarfiullu allineqarnissaa.
-Kissaatigaara timmisartoqarfiup allineqarnissaa, timmisartut nuannarigakkit. Naluttarfiup allinissaa kissaatigaara, inuttugaangat inissaaleqisaratta, Lars Joorut oqaluttuarpoq.
Nikkuliip kissaatigaa meeqqat ullumi nuannaaqatigiissasut.
-Meeqqat nuannaaqatigiinnissaat, pinnguaqatigiinnissaat, ilagiinnissaat kissaatigaara. Uanga nuannaarniaraangama kammalaatikka ilagisarpakka taava nalukkiartarpugut illaqattaaqatigiillutalu, Nikkuliit oqarpoq.
Maliinap kissaatigaa Kalaallit Nunaanni meeqqat qinngasaartittarunnaarnissaat.
-Soorlu innarluutilik qinngasaartissinnaasarpoq atuarfimmullu allamut nuulluni, Maliina oqarpoq.
Paarnannguup inersimasut silami pujortartalinnissaat kissaatigaa, meeqqallu qinngasaaruttarunnaassasut annersaattarunnaarlutillu.
-Soorlu pulaarluni pujorsunnitsoq nuanniittarnermik. Silami pujortartuugunik ingerlaannaq pujoq tammartassagaluarpoq. Kissaatigaara aamma meeqqat qinngasaarukkunnaassasut, anitsiarfiit tamaasa qinngasaaruttoqartarpoq ilaannilu unataattoqartarluni, Paarnannguaq oqarpoq.
Nadinap eqqagassarsuit silamiiginnartut biilillu pujorsuinik mingutsitsinersuaq tujorminarpallaaqimmata unitseqqugaluarpaa.
-Aamma brugsen-ip silataani inersimasut imerpallaannginnissaat kissaatigaara kamaattassanngitsullu, ilaanni putumaleraangamik imminnut kamaattarput nilliaffigisaqattaalerlutillu, Nadina oqaluttuarpoq.
Nuummi meeqqanut atuartunut nalunaaqutaq ataatsiniit sisamat tungaannut Inussivimmi assigiinngitsunik sammisaqartitsisoqassaaq.