Franskit naaggaarnerat nunatsinnut sunniuteqangaarnavianngilaq
EU-mi inatsisissamik tunngaviusumik isumaqatigiissut Frankrigemi ippassaq taasissutigineqarmat fransket 55%-ii naaggaarput. Frankrig-i nunat EU-mi ilaasortaasut pingaaruteqarnerpaat ilaattut isigineqartarpoq, franskilli naaggaarnerat nunatta EU-mut isumaqatigiissuteqarneranut siunissaq ungasinnerusoq eqqarsaatigalugu annertunersumik kinguneqassangatinngikkini, aningaasaqarnermut nunanullu allanut naalakkersuisoq Josef Motzfeldt oqarpoq.
-Suli sunniuteqartussatut oqaatigineqarsinnaanngilaq.Taaseqattarnerit 2006 ilanngullugu ingerlanneqartussaapput. Isumaqatigiinniutit marluk nunatta EU-llu ingerlataat ukioq manna naatinnagu naammasereertussaapput, ukiullu naalernerata missaani EU parlamentimut isumaqatigiinniutissatut tunniunneqartussaallutik. Taamaattumik ullumikkut oqaatigineqarsinnaanngilaq Frankrigep naaggaarnera nunatsinnut ajunngitsumik ajortumilluunniit sunniuteqassasoq.
Demokraatineersoq Pale Christiansen isumaqarpoq nunatta EU-mut ilanngutsinneqarsinnaanissaa maannakkugaaq eqqarsaatigineqalereertariaqartoq, tamannali Josef Motzfeldtip pissutissaqarsorinngilaa.
-Sunik iluatinnartunik sunillu misissugaassaasinnaasunik peqarnertik oqaatigillannguaqqaarnagu asuli taamatut oqaannarnerat uanga oqaaseqarfigissallugu ajornakussortittorujussuuara.
Josef Motzfeldt oqarpoq nunanut EU-mut siorna ilaasortanngortunut pisoorsuunngitsunullu, nunat pisuut soorlu Frankrigip Hollandillu qanoq isummerneri eqqarsaatigissagaanni nunatta EU-mut ilanngussinnaanissaa nangiarnartoqartoq.
- Nunatsinnut orniginartua uanga takusinnaanngilluinnarpara. Taamaammat EU-ip avataaniikkaluarluata, nunatta EU-mut isumaqatigiissuteqarsinnaanera nutaaliorneruvoq. Tamanna EU-mi qullersat tutsuiginartutut taavalu siunissami nunanut allanut isumaqatigiissuteqartarnissaminni nalerassatut isigimmassuk, isumaqarpunga nunatta EU-mut tunngatillugu ullumikkutut inissisimanera pitsaanerpaatut oqaatigineqarsinnaasoq.
Danmarkimi ministeriunerup Anders Fogh Rasmussen-ip danskit EU-mi inatsisissamik tunngaviusumik isumaqatigiissummut septembarip 27-ianni taasitinneqarnissaat suli aalajangiusimavaa.