Kalaallit EU pillugu qinersillik

Frankrigimi EU pillugu qinersisoqarnera Kalaallit Nunaannut assigiinngitsutigut kinguneqarsinnaavoq, Demokraatineersorlu Palle Christiansen isumaqarpoq Kalaallit Nunaata EU-mut ilaasortanngorniarnissani eqqarsaatigisariaqaraa.

Nunat EU-mut ilaasortaasut inatsisissatut malitassaat nutartigaq, Frankrigimi qinersisitsissutigineqarpoq, unnuk mannalu paasinarsissaaq angerneqassanersoq naaggaarneqassanersorluunniit. Frankrigimi innuuttaasut kingusinnerusukkullu nunat EU-mut ilaasortaasut inatsisissap allanngornissaa naaggaassappassuk, Kalaallit Nunaata EU-llu suleqatigiinnerat allannguuteqassanngilaq. Akerlianilli EU-p inatsisissaa nutartigaq angerneqassagaluarpat, Kalaallit Nunaata ajoqutigisinnaagaa, Palle Christiansen Demokraatineersoq isumaqarpoq. Nangillunilu oqarpoq Kalaallit Nunaat EU-mut ilanngunniartariaqartoq.

EU-p ataatsimoorussamik inatsisissaata Frankrigimi taasititsissutigineqarnera naaggaarneqassagaluarpat Kalaallit Nunaata EU-mut attaveqarnera allanngornavianngilaq. Akerlianilli EU-p ilaasortaasa ataatsimoorussamik inatsisissaat angerneqassappat Europa-mi nunat EU-mut ilaasortaasut suleqatigiinnerat iminnut qaninnerulersutut ilissaaq, maannakkullu nunat EU-mut ilaasortanngorniarlutik utaqqisuniittut aqqaneq-marluupput. Kalaallit Nunaat aalajangissagaluaruni EU-mut ilaasortanngussalluni, EU-mut ilaasortanngorniarsinnaaneq ajornarnerulissaaq, Palle Christiansen oqarpoq nangillunilu; - Isumaqarpunga Kalaallit Nunaat EU-mut ilaasortanngorniarsinnaanera misissorneqartariaqartoq. EU-mut ilaasortanngoraanni ajoqutaasinnaasut iluaqutaasinnaasulluunniit misissorlugit aallartereerneqartariaqarsoraakka, Palle Christiansen Demokraatineersoq oqarpoq.

Kalaallit Nunaat EU-mit aniniarluni aalajangermat, inuiattut kinaassuseqarneq annertunerusumik pineqarpoq, ullumikkulli Kalaalit Nunaanni pisut eqqarsaatigissagaanni, inuiaqatigiit ajornartorsiutaat annertoqaat, assersuutigalugillu taaneqarsinnaapput meeqqanik sumiginnaasarnerujussuaq, ilinniarsimasunik amingaateqarneq, nunallu iluani angallanniarnikkut aningaasassaaleqineq, innaallagiaqarnermillu pilersuiniarneq. EU-mut ilaasortaagaluarutta tamakkua ajornannginnerusumik aaqqiivigineqarsinnaagaluarput, Palle Christiansen oqarpoq nangillunilu;- Maannakkut EU-mut ilaasortaannginnerput pillugu sunissannguit tamaasa isumaqatigiinniutigeqqaartarpagut.

Palle Christiansen aamma oqarpoq, Kalaallit Nunaata nunat EU-mut ilaasortaatitaasa nunatsinnukarnissaat anguniarlugit nunatsinnut aggersarneqartartut, tassuunalu takuneqarsinnaasoraa, Kalaallit Nunaat EU-mut ilaarusuttoq.

Taamani Kalaallit Nunaat EU-mut ilaasortaaginnarnissamut naaggaarmat, taamani politikeriusimasut suli nuimasuupput, EU-mullu ilaasortanngoqqissinnaaneq eqqartorneqaleraangat taamani aalajangersimanermut saassussinertut politikeritoqqanit tiguneqaqqajaasarluni, tamannali taamaattussaasorinanngilaq. Taamanikkut EF-mit anineq aalajangerneruvoq, nutaamilli eqqarsaqqittariaqalernertut tiguneqarluni EU-mut ilaasortanngoqqissinnaaneq eqqartorneqartariaqarpoq, Palle Christiansen naggasiivoq.

Palle Chrsitiansen Demokraatineersoq aamma oqarpoq, Kalaallit Nunaat EU-mut ilaasortaagaluarpat, angallannermut aningaasartuutit annikinnerulissasut, taamaasillunilu Kalaallit Nunaanni aningaasartuutaasussaagaluartut sipaarneqartut suliffinnik pilersitsinernut atorneqarsinnaasut.