Sisimiut kulturikkut illutaalerpoq

Ippassaq unnukkut Radioaviisimi oqaatigineqareersutut Sisimiuni kommunalbestyrelsip aningaasaqarnermut ataatsimiititaliaanit, kulturikkut illussap sananeqarnissaa akuersissutigineqarpoq. Illutaassaq 31 mio koruuninik akeqassaaq, aningaasartuutissat ilassutissaat pilersaarutaaqqaartumut sanilliullutik 10 mio koruunit missinginik amerlanerullutik.

Illutaassap pilersaarutaqqaartumit akisuneruneranut pissutaavoq, inersuup allatut sananeqarnissaanik aalajangerneq. Tassani isiginnaartsitsisarfik issiaviillu peerneqarsinnaasunngortinneqarsimagamik. Tamatuma kinguneranik pequusivissamik sananissaq pisariaqalerpoq, ilanngullugu cafe pilersaarutaareersumit anginerusoq aamma sananeqassalluni.

Aalajangerneq junip ulluisa pingajuanni kommunalbestyrelsip ataatsimiinnissaani naqissuserneqassaaq.

Tamannali aporaannertaqanngitsoornaviarunanngilaq.

Illuatungiliuttut Inuit Ataqatigiit Demokraatillu saqqummiutilersaarpaat, aningaasartuutissatut missingersuutaasut 10 mio koruuninik amerleriarnerat. Inuit Ataqatigiit sinnerlugit Agathe Fontainip nalunaarutigaa, partiinit kissaatigineqartoq pilersaarutip taamaatikkallarneqarnissaa.

Siumukkulli Atassutikkullu amerlanerussuteqarput, taamaattumillu ilimagineqarsinnaavoq, sanaartugassap Sisimiuni kommunalbestyrelsi junip ulluisa pingajuanni ataatsimiilerpat, akuersissutigineqavinnissaa piviusunngorumaartoq.