Arsuup kangerluani Ivittuuni aqerlumik mingutsitsineq suli annikilliartorpoq, zink-imilli mingutsitsineq allanngorsimanngitsoq, Danmarkip avatangiisinut Misissuisartuisa nalunaarusiaanni saqqummeqqammersumi atuarneqarsinnaavoq.
Arsuup kangerluata silammut sammisaani kangerluullu silataani 3-4 kilometer-isut avasitsigisumi uillut aqerlumik suli annertuallaartumik mingutsinneqarput.
Taamaammat Danmarkip Avatangiisinut Misissuisartuisa uillut, Ivittuuni 10 kilometer-isut isorartutigisumi katersorneqarsimasut nerineqarnissaat inassutigisinnaanngilaat.
Aamma kangerluup annersaani equutit zinkimik akoqarpallaarput.
Mingutsitsineq 1854-miit 1987-ip tungaanut kryolit-imik piiaanermit pisuupput. Kryolit-imik piiaanermi ujaqqat atugassaanngitsut sineriak malillugu iginneqartarsimapput, taamaalillunilu aqerloq zink-ilu kangerlummut mingutsitsilerluni.