Nannunnikut akiligassinneqarput
Kujataani angutit inuusuttut siorna aasakkut nannumik nigarlugu inatsisinillu unioqqutitsillutik pisaqarsimanerannik eqqartuussivimmi suliaq naammassigaluttuarpoq, Qaqortumi politiit ittuat Bent Ole Kleist taama ilisimatitsivoq.
Inuusuttut nannuttut ilartik ataaseq minillugu tamarmik immikkut 3000 koruuninik akiligassinneqarnertik akuerisimavaat. Nunatsinni nigarlugu nannunniarneq inerteqqutaavoq oqaatigineqarporlu inuusuttut pineqartut arlaannaalluunniit nannunnissamut akuersissuteqarsimanngitsoq.
Angutit inuusuttut sisamaata akiliisitaanissanut akuersiumannginnera Nanortalimmi politiinut ingerlateqqinneqassaaq, Nanortallip eqqartuussiviani aalajangersaavigineqartussaammat, Bent Ole Kleist ilisimatitsivoq.
Aamma piniartoq, inuusuttunik ikiuiniarluni nannumik nígakkamik aallaannittoq 5000 koruuninik akiligassinneqarpoq. Piniartup nanoq qoorortuuaqqamik aallaasivaa, inatsisillu malillugit nannut aallaasinik aallarneqqortuunik aallaaneqartussaapput.
