Jens Napaattooq inatsisinik unioqqutitsisutut suaartaatigineqarpoq
Landskarsip siorna naatsorsuutai akuerisassanngorlugit siullermeerlugit inatsisartuni ullumi oqaluuserineqarmata, Ineqarnermut Naalakkersuisup inigisaminut akiliisarsimannginnera assortuussutigineqarpoq. Jens Napaattooq inatsisinik unioqqutitsisimasoq Demokraatit isumaqarput, Jens Napaattoorli akiliisannginnerminut nassuiaatissaqarnerarpoq.
Kukkunersiuisut Deloitte og Touche Landskarsip naatsorsuutaanik uparuaasinnaanertik tunngavigalugu Jens Napaattuup ilaqutaasalu utaqqiisaasumik inigisaminut ukiup affaa akiliisimannginnerat uparuarpaat. Uparuaanerlu kukkunersiuinermut ataatsimiititaliamut annguppoq.
Kukkunersiuinermullu ataatsimiititaliami ilaasortaq Demokraatineersoq Palle Christiansen sakkortuumik inatsisartuni ullumi uparuaavoq naalakkersuisoq iniminut siorna februaarip 15-ianit septembarip sisamaat tikillugu akiliisimanngimmat inatsisinik unioqqutitsisoq.
Atassutip naatsorsuutit pillugit oqaaseqartuata Jakob Sivertsenip qalleqqissarlugu aamma uparuarpaa Jens Napaattooq inigisaminut akiliisimannginnera akuerisinnaanagu.
Ineqarnermulli naalakkersuisup Jens Napaattuup naatsorsuutit suli suliarineqarmata ineqarnerminut atatillugu uppernarsaatit kukkunersiuisut pissarsiarissaqqaarai neriorsuivoq.
- Inatsisinik unioqqutitsisimasutut, inummillu malersuinertut piaaraluni oqaluuserineqarnerata inerneqarnera nuannarinerpaajunngilara,
Jens Napaattooq oqarpoq.
Jens Napaattooq nassuiaavoq, naalakkersuisutut toqqarneqarnerminut atatillugu Illoqqortoormiunit Nuummut nuunnermini utaqqiisaasumik ilaquttanilu ineqartinneqarsimallutik, pequtitillu suli Illoqortoormiunit tikissimanngitsut. Ukiamulli uppernarsaataasinnaasut tamaasa kukkunersiuisunut tunniunneqareerpata inatsisinik unioqqutitsineraaneq taamaanngitsoq uppernarsarneqarumaartoq Jens Napaattuup neriuutigaa.
Kukkunersiuisut uparuaanerat Naalakkersuisut junip arfernat nallertinnagu akissuteqarfigissavaat, Inatsisartullu tamatuma kingorna ukiaru aappassaaneerlugu oqaluuserissallugu.
