Nipilersortartut aningaasanik tunineqartut

Nunatsinni nipilersornermut siuarsaatissanik Nunat avannarliit Nipilersornikkut kometi-at Nomus svenskit koruuniisa 100.000-it sinnerlugit aningaasaliissuteqarpoq. Nomus-ip nunatsinni nipilersorneq pillugu seminareqartitsinerata kingorna tamanna pivoq, Nomus-ip siulittaasuata Bjørn Krusep aningaasat kultureqarnermut naalakkersuisumut Henriette Rasmussen-imut tunniuppai.

Seminareqartitsineq maajip arfineq aappaanni ingerlanneqarpoq. Seminareqartitsinermi nunatsinni erinarsoqatigeeqarneq nipilersortartuuneq tassungalu atasut ajornartorsiutaasinnaasut kiisalu nipilersornermik nunatsinni ilinniartitsisarneq sammineqarput.

- Seminareqartitsinermi taama sivikitsigisumik ingerlanneqartumi Kalaallit Nunaanni nipilersornermut tunngasut tamakkerneqanngikkaluartut, seminaareqartitsineq iluatsilluarpoq, Bjørn Kruse oqarpoq.

Nunatsinni nipilersortartut nunani avannarlernisut aamma kattussinnaanerat taamaalillutillu ataatsimik tunngavissiorneqarnissaat aamma eqqartorneqarpoq.

Nipilersornikkuttaaq paasissutissiivimmik, nipilersortartut siunnersoqatigiiffigisinnaasaannik pilersitsinissaq aamma eqqartorneqarluni. Nomus-ip aningaasaliissutai anguniakkamut aalajangersimasumut tunngatinneqanngillat, nunarpulli sinnerlugu Nomus-imi ilaasortaasoq suleqatigalugu aningaasat sumut atorneqarnissaat tunissuteqarnermi siunertaasoq Nomus-ip siulittaasua Bjørn Kruse oqarpoq.