Angut inuusuttoq qungatsimigut savimmik arfinileriarlugu kapineqartoq
Nuummi Jagtvejimi oqqattoqarnerata kingorna tamanna pivoq. Qujanartumik inuunerminik navianartorsiortitsinngilaq, annertuumilli ikiligaasimavoq sulilu nakkutigineqarluni.
Pisup kinguninngua angut 27-nik ukiulik Nuummilu najugaqartoq tigusarineqarpoq. Sisamanngormat ualikkut inatsit tunngaviusoq naapertorlugu killisiorneqarpoq. Politiit suliamik misissuinerannut atatillugu unnerluutigineqartoq sapaatit akunnerini sisamani tigummigallassanngortinneqarpoq.
Politiittaaq paasissutissiissutigaat ulapittupilussuusimallutik. Angerlarsimaffinni eqqissiviilliornerit arlaqarsimapput inuillu imigassartorpallaarsimasut ajornartorsiutigineqarsimallutik.
Naak ulloq ulapinnarnerusimagaluartoq, politiit nalinginnaasuunerarpaat, poorski ullorlu akissarsiffik ataatsikkoormata.