Sisimiuni kommunealbestyrelsissanik ullumi qinersisoqaqqissaaq. Qaammatip ataatsip ingerlanerani aappassaanik tamanna pissaaq.
Apriilip tallimaani qinersinermi Malik Berthelsen-i qinersisinnaananilu qinigassanngortinneqarsinnaanngikkaluarluni qineqqusaartut akornanni allassimavoq, taasiserpassuaqaramilu kommunalbestyrelsemut iseraluarluni. Taasiserpassuili atorsinnaanngillat taamaammat qinersisoqaqqittoqartariaqalerpoq.
Malik Berthelsen-imut taasisuugaluit ullumi allamik taasisariaqarput, tamannalu pissanganartunngorsinnaavoq, illuatungiliuttut katersuutilersimammata. Apeqqutinngortorlu tassaavoq borgmesterinngoraluartoq Hermann Berthelsen-i ataannassanersoq.