KANUKOKA periuutsimik allannguisoqarnissaanik ujartuivoq

Siornatigut Qinigaasinnaanermut Ataatsimiititaliat qinigaasimasut allattorsimaffiannik politiinut nassiussereeraangamik, qinigaasimasut pineqaatissinneqarsimasinnaanerannik paasissutissanik pisariaqartunik ingerlaannartumik pissarsisinnaasaraluarput. Maannali suleriaaseq allanngortinneqarsimavoq, paasissutissanik tamakkuninnga Qinigaasinnaanermut Ataatsimiititaliat tunineqarsinnaassappata kommunalbestyrelsimut ilaasortanngorlaat pisinnaatitsissummik atsioqqaartariaqaramik.

KANUKOKA-p siulittaasuata Jens Lars Fleischer-ip Naalakkersuisut siulittaasuannut Hans Enoksen-imut allagaqarluni assorsuaq isorisariaqartuunerarpaa, Kalaallit Nunaanni Politimesterip suleriaatsimik allanngortitsinermigut Qinigaasinnaanermut Ataatsimiititaliap kommunalbestyrelsinut ilaasortanngorlaanik akuersiniarnerani kinguarsaanera.

-Massakkut aatsaat uppernarsaammik atsioqqaarluni ilumut pineqaatissinneqarsimannginnermut uppernarsaatinik tunniussisoqartarnera, massakkut aatsaat paasilerlutigu kinguarsaataangaatsiassasoq paasisimavarput. Taannalu pitinnagu kommunalbestyrelsit naapissinnaannginnarat aamma paasisimallutigu, Jens Lars Fleischer oqarpoq.

Ilanngullugu oqaatigaa siusinnerusukkut allannguineq ilisimatitsissutaareersimassagaluartoq qinersinerluunniit sioqqullugu piumasaqaatinik nassiussuisoqarsimassagaluarluni. Massakkullu allannguinerup kingunerigaa katersuunnissat aatsaat akuersissutit tunniunneqareerpata pisinnaagamik, tamassumalu pinngitsoorani kommunit aningaasaqarneranut annertuumik kalluisussanngorami.

-Naalakkersuisut arlaatigut iliuuseqartariaqarput, siunissamilu kommunalbestyrelsimut nunaqarfinnullu aqutsisunut qinersisarnerni periuseq atorneqaannassappat, qanoq periuseqartoqarnisaa nukingisaarutigivarput, Jens Lars Fleischer oqarpoq.

Jens Lars Fleischer-ip ilanngullugu oqaatigaa periuutsimik allannguiniartoqarneranik paasitinneqaqqaarsimannginnamik.