Nuup Kommunea paatsiveeruppoq
Nuup Kommuneani kommunalbestyrelse siunissaq qaninneq eqqarsaatigalugu qanoq suleriaqqissanersoq nalornissutigineqarpoq.
- Nuup kommunalbestyrelseata inissitsiternissaa suli pisinnaanngimmat, qanoq suleriaaseqarnissarput pillugu Nunami namminermi pissutsinut allaffimmut saaffiginnissimavugut. Taama oqarpoq Nuup kommuneani tusagassiisartoq Jesper Hansen.
Nuup kommuneani qanoq suleriaaseqartoqarnissaa pillugu nunami namminermi pissutsinut allaffimmut saaffiginnissut suli akineqanngilaq, tassani sulisut amerlanerit ulluni makkunani Kangerlussuarmi ataatsimiigiarsimammata.
Maannakkorpiaq Nuup kommuneata qanoq suleriaaseqarnissani pisinnaatinneqarsinnaanilu nalornissutigaa.
Kikkut ataatsimiittarnerni akissarsitinneqartassanersut aamma suli ilisimaneqanngitsoq, Jesper Hansen paasissutissiivoq.
Malittarisassat malillugit kommunalbestyrelsiusimasoq aqagu atorunnaarsinneqarluni ilaasortat nutaat ikkuttussaagaluarput, taamaaliorsinnaanerli maannakkut unittooqqavoq.