Sisimiuni qinerseqqinnissaq iluarisimaarpaat
Sisimiuni kommunemut qinerseqqinnissaq pisussanngormat Siumut partiianut illuatungiuliuttut iluarisimaarinnipput.
Atassut sinnerlugu Sisimiut kommuneani qinigaasimagaluartoq Søren Alaufesen ima oqarpoq;
- Naammagittaalliutitta taamatut aalajangiiffigineqarnera iluarisimaarparput. Naammagittaalliutitta toqqammavia, tassa qinersinermi taasinerit atorsinnaajunnaarsinneqartut partiimut Siumumut tunniunneqarsimagaluarneri. Inatsisit malillugit qinersisitsinermik ataatsimiisitaliaq sulisussaavoq, tamannalu ajornartorsiutaasimammat isumaqarpugut qinersisitsinermik ataatsimiisitaliaq inatsisilerituunik amerlanernik inuttaqartariaqaraluartoq. Taama oqarpoq Sisimiut kommuneani qinersinermi kingullermi Atassut sinnerlugu qinigaasimagaluartoq, Søren Alaufesen. Sisimiuni Demokraatit sinnerlugit qinigaasimasoq Palle Christiansen aamma oqarpoq, Sisimiut kommuneani kommunalbestyrelsemi qinerseqqittoqarnissaanik qinisersisitsinermi ataatsimiisitaliap aalajangernera naammagisimaarlugu.