Inatsisartuni utoqqaat oqallisigineqassapput
Inatsisartut ualimut ataatsimiilerpata, utoqqalinersialinnut tunngasut arlallit eqqartorneqassapput.
Eqqartorneqartussanut ilaavoq aappariinnut kisimiittunullu tamakkiisumik utoqqalinersiat, aammalu siusinaartumik utoqqalinersiallit isertitarisinnaasaanut, aalajangersimasumik killigitinneqartup atorunnaarsinneqarnissaa. Taannalu Ruth Heilmann-mit siunnersuutigineqarniarpoq.
Siunnersuutip taassuma saniatigut Atassutip inatsisartuni ilaasortaatitaasa siunnersuutiginiarpaat utoqqalinersiallit inuuniarnikkut aningaasartuuteqareernerisa kingorna, aningaasanik tigummiaanik sinneruttussanik minnerpaaffiliinissaq. Siunnersuutillu taakkua sulissutigineqarnissaanut Naalakkersuisut peqquneqarnissaanut inatsisartut aalajangiiffigisassaatut siunnersuutigineqarput.
Demokraatineersoq Astrid Fleischer Rex aamma apeqquteqaateqassamaarpoq, utoqqaat katissimasuuneri pillugit assigiinngisitsisarnermut tunngasumik.