Nuuk Tourism sinneqartoorpoq

Nuummi takornariartitsinermik sullissivik Nuuk Tourism A/S ingerlalluarpoq. Nuuk Tourismip pingasunngormat ataatsimeersuartitsinerani angusat saqqummiunneqarmata paasinarsivoq, suliffeqarfik siorna 100.000 koruunit sinnilaarlugit sinneqartooruteqarsimasoq. Aamma aningaasat kaaviiaartitat million koruunip tungaanut amerlisinneqarsimapput.

- Ukiut siulii marluk amigartoorluni ingerlasarsimammat maanna sinneqartooruteqarmat naammagisimaarnarpoq, Nuuk Tourismip siulittaasua Anna Heilmann Pedersen oqarpoq.

Nuuk Tourismip siorna ukiumi kaaviiaartitai million koruunit tungaanut amerlisimavai, siulittaasorlu Anna Heilmann Pedersen nassuiaavoq, aningaasanik aqutsilluarnerulersimanerup saniatigut suliniutit assigiinngitsut nutaat ineriartortinneqarsimanerat.

Nuuk ukioq 2004-mi umiarsuarsuarnit takornariartaatinit tikinneqarluartarsimavoq, umiarsuit 20-t missaanniittut tikissimallutik. Aamma takornariartitsisarnerit nalinginnaasut saniatigut nutaanik ineriartortitsisisoqarsimavoq, soorlu kangerlunnut angalaartitsinerit kiisalu qulimiguulimmik takornariartitsisarnerit neqeroorutigineqartalersimallutik. Ukioq manna nutaanik aamma suliniuteqartoqarpoq, kangerlummi pisulluni takornariartitsisoqartalissalluni.

Suliffeqarfilli ingerlalluaraluartoq suli unamminartoqarpoq. Nuummi umiarsualivik mikivallaarmat umiarsuarsuit amerlanerusut tikittalernissaat anguniarlugu Nuup Kommunea suleqatigalugu nuutoqqami taaneqartartumi ikaartarfiliiniarnissaq siunniunneqarpoq:

- Eqqartorparput, allatut ajornartumik qanoq iliuuseqarniartariaqarluta, puttasuliiniarsariniarluta. Soorunami iluatsitsissalluta neriuutigaarput.

Anna Heilmann Pedersen oqarpoq.