Efterskolertarneq inatsisartuni eqqartorneqassaaq

Inatsisartut ualimut ataatsimiilerunik inatsisartuni ilaasortat arlallit, efterskolertitsisarneq pillugu siullermeerutaasumik oqallisissatut aalajangiiffigisassatullu saqqummiussissapput.

Danmarkimi efterskolertarnermut atatilugu ilinniartitaanermut pisortaqarfiup misissuititsisimanera inatsisartuni ualimut saqqummiunneqassaaq, nalunaarusiallu taassuma takutippaa efterskolertarnermut atatillugu ajornartorsiutaasut tassaasut, efterskoleriartinneqartartut amerlavallaat danskisut oqalussinnaanerisa pitsaavallaannginneri.

Inuussuttuaqqat allat angerlarsernermikkut, ilaquttanilluunniit ornittakkanut attaveqarniarnikkut ajornartorsiuteqartarput, ilaasalu aanngajaarniutinik atuisarnertik ajornartorsiutigisarlugu.

Efterskolimi atuarfiusumi 2002-mi 2003-milu ilinniartut sisamaagaangata ataaseq uniinnartarpoq, uniinnartartullu tassaanerupput atuarfimmi naliginnaasumik atuartinneqarsimasut. Efterskolini atuartut 11 procentii siorna uniinnarsimapput.

Atuartut qaffasinnerusumik atuarfimmiit naammassisimasut erfterskolernerminni ingerlalluarnerusarput. Taakkua 6 procentiinnaai ukioq kingulleq unissimapput, ukiup siuliani 17 procentit unissimasut.

Inatsiartuni oqallisissatut aalajangiiffigisassatullu saqqummiussinissat assigiinngitsut tallimaassapput, ilaatigut efterskolemut qinnuteqarsimasunut itigiartinneqarsimasunulli, Naalakkersuisut periarfissiinissaannik immikkut aningaasaliisoqarnissaanik siunnersuuteqartoqassaaq.

Siunnersuutip aappaat taassaavoq, ukioq 2008-mi atuaqatigiiaat marluk meeqqat atuarfianiit soraarummeertussaammata efterskolertitsinissanut aningaasanik amerlanerusunik aningaasaliisoqarnissaanik Naalakkersuisut peqquneqarsinnaanik siunnersuuteqartoqassasoq.

Tassungalu atatillugu ukiuni 2008-mi 2009-milu efterskolertitsinissanut aningaasaliinerit qaffanneqarnissaat siunnersuutigineqarpoq.

Aamma efterskolertartunut tapiissuteqartarnermi ilinniartut pissarsiaat apeqqutaatinnagit tapiissuteqartalernissaq siuunnersuutigineqassaaq.

Efterskolersimasut maanaannaq unissimatillugit Danmarkimiit angerlarnissaat angajoqqaanit akilerneqartalernissaa aamma siunnersuutigineqassaaq.