Akiitsuminnik akilersuisinnaanissaminnut qularput
Aalisariutaatillit akiitsullit 139-t Aalisarnermut Pisortaqarfimmit allaffigineqarput, akilersuinissaq siunertaralugu aaqqiissutissamik ullut 30-t qaangiutsinnagit nassaarniaqqullugit.
Akiitsulinnut ilaapput, Uummannami aalisariutaatillit 16-it. Taakku angallataat aserfallassimammata uninngaannalersimapput, uninngaannalernerisa kingunerisaanik akilersuinerat aamma unissimalluni.
Uummannami aalisartoq Kristian Jensen 27 fodsimik qaleralinniummik 1984-imi aalisariutisivoq, Inuussutissarsiornermut Tapersiisarnermi Ataatsimiititaliamit ESU-mit tapiiffigineqarluni.
Kristian Jensenili ukiuni kingullerni aalisarluarpallaarsimanngilaq, ilaatigut motoorerliortarnini pissutigalugu. Tamatuma kingunerisaanik akiitsuminik akilersuiniarnera aamma ajornarsisimavoq, taamaalimmallu aalisartoqatini allat 15-it peqatigalugit Namminersornerullutik Oqartussanut februaarimi qinnuteqarpoq, angallatimi iluarsartinnissaanut akiligassanillu oqilisaanneqarnissani siunertaralugu. Ippassarlu akisivoq, akiligassani 200-300.000 koruunit missaanniittut ukioq naatinnagu akilereersimassagai. Akiliisinnaassanerlugit ?
- Ilimananngilaq. Angallatiga nunap qaaniippoq, motoorialu iluarsissappat aqqassagukkulu sikuaqarnera aalisarluarnissannut aamma apeqqutaaqataasussaassaaq, taamaattumik ukioq naatinnagu akiliisinnaanissara qularaara. Kristian Jensen oqarpoq.
Aamma nassuiaavoq, siorna angallatiminik 100.000 koruunit sinnilaaarlugit isertissimallugit, maannakkullu ukioq naatinnagu 300.000 koruunit tungaanut akilerniassagunigit tamakkersinnaanaviarnagit.
Kristian Jensenip erseqqissaatigaa, Uummannami aalisartut pineqartut ataatsimoorlutik Namminersornerullutik Oqartussanut kommune ikiorsiorlugu aqagu allagaqalersut, arlaatigut akiligassanik oqilisaanneqarnissaq anguniarniarlugu.
Nuna tamakkerlugu aalisariutaatillit akiitsullit 139-t akilersuinerat unissimammat Namminersornerullutik Oqartussanit inatsisit naapertorlugit allaffigineqaqqammerput akiitsumik akilersornissaannut nassaarniaqqullugit. Allaffigineqartullu tamarmik akissuteqarsimaleriarpata pisortaqarfimmit nalilersueqqittoqassasoq Aalisarnermik Naalakkersuisoq Rasmus Frederiksen erseqqissaavoq.
- Akissuteqareerpata qanoq aaqqiivigineqarsinnaassasut paasinarsissaaq, Uummannamilu aalisartunut tunngatillugu akissutaat aallaavigalugit nalilersueqqissaagut, massakkulli taarsigassarseqqinnissaminnut periarfissaat killilerneqareerpoq. Rasmus Frederiksen oqarpoq.
Nuna tamakkerlugu aalisariutaatillit ESU-mut akiitsullit 139-t akiitsui katillugit 105 million koruuninik naleqarput.