Angajoqqaarsiaq: Videoliuummik immiussisoqartalerli

Meeqqat kinguaassiutitigut atornerlunneqarsimasut tamarmik videoliuummik aallaqqaammulli killisiorneqartalertariaqartut, atornerlunneqarsimasup angajoqqaarsiaa isumaqarpoq.

Bent Sand Narsami meeqqat atornerlunneqarsimasut aqqanillit ilaannik 14-nik ukiulimmik meerarsiaqarpoq, isumaqarporlu, meeqqat aqqaneq-marluk sinnerlugit ukiullit eqqartuussivimmi killisiorneqaqqittariaqartarnerat ingasappallaartoq, meeqqat misigissutsimikkut sakkortuumik misigisaqareernerat eqqarsaatigalugu.

Bent Sand ima oqarpoq:

- Atornerluineq piffissami sivisuumi pisimavoq, taamatuttaaq piffissaq sivisooq atorlugu eqqartuussivilersuussiniarluni piareersartoqarsimavoq. Eqqartuussinerlu aallartimmat meeqqat angutip atornerluisimasup saavani nassuiaasinneqarput. Maanna Nunatta Eqqartuussivianut suliassanngortitsisoqarmat aamma nassuiaasinneqaqqissinnaapput. Ingasappallaaqaaq, meeqqat taama sakkortutigisumik misigiteqqinnissaat. Bent Sand oqarpoq.

Angut 52-inik ukiulik nukappiaqqanik aqqanilinnik kinguaassiutitigut atornerluisimasutut Narsap eqqartuussiviani sapaatip-akunnerani kingullermi eqqartuunneqaqqammerpoq, piffissamilu aalajangersimasumik sivisussusiligaanngitsumi parnaarussivimmut tarnip nakorsaanik ingerlanneqartumut, tassalu Herstedvesterimut inissitassanngorlugu pineqaatissinneqarpoq. Angutilli illersuisuata eqqartuussiviup aalangernera Nunatta Eqqartuussivianut suliassanngortimmagu Nunatta Eqqartuussiviata suliarisussanngorpaa, qaquguli tamanna pissanersoq suli aalajangiunneqanngilaq. Tamatuma kingunerisaanik meeqqat aamma nassuiaasinneqaqqittariaqarsinnaapput, piumasalli annertuallaartut Bent Sand isumaqarpoq.

- Meeqqat qassinilluunnit ukioqaraluarpata aallaqqaammulli videoliuummik immiunneqarsimasariaraluarput, tamarmik sakkortuumik misigisaqarsimammata artukkiisumik. Bent Sand tunngavilersuivoq.

Politimesterip tullersortaa Steen Thomsen tamanna pillugu ima akissuteqarpoq:

- Meeqqat aqqaneq-marluk inorlugit ukiullit sapinngisamik videoliuummik immiunneqartarput, meeqqalli aqqaneq-marluk sinnerlugit ukiullit eqqartuussivimmi nassuiaasinneqaqqittarput, soorunami suna pineqarnersoq apeqqutaatillugu. Taakku aamma immiunneqarsinnaagaluarput, taamaaliortoqassappalli isumaga malillugu immikkoorluinnartumik iliuuseqarnerussaaq. Steen Thomsen nassuiaavoq.

Angutip 52-inik ukiullip illersuisa Leif Ellebæk Motzfeldt Radioavisimut oqarpoq, meeqqat nassuiaaqqinnissaminnut sioorassuteqarsimassappata ajuusaarutigalugu.

- Pissutsilli taamaapput. Eqqartuussiviup nassuiaatit tamaasa tusarnissai pingaaruteqartuaannarmat. Leif Ellebæk Motzfeldt erseqqissaavoq.