Nukappiaqqat aqqanillit Narsami kinguaassiutimikkut atornerlugaareerlutik, immikkut ornittagassaanik Narsami pilersitsisoqaraluarpoq, Narsalli kommunea novembarip qaammataani akissaarummat, Namminersornerullutik oqartussanut Narsap kommunea aningaasanik qinnuteqaraluarnera itigartinneqarsimasoq AG-it allaaserineqarpoq.
Narsap kommuneani tarnit pissusiinik ilisimasalittut atorfilik, Ernst Peilmann, oqarpoq nukappiaqqanut atornerlugaasimasunut angajoqqaavinullu ikiuiniarlutik orniguttarfik pilersinneqarsimasoq.
- Nukappiaqqat atornerlugaasimasut ilaqutaalu atugarlioreeqaat, ilaatigut suliffissaqarniarnikkut tarnikkullu. Orniguttarfiup matuneqarnerata kingorna nukappiaqqat ilaat angerlarsimaffianiit peersinneqartariaqarsimapput, Ernst Peilmann AG-mut oqarpoq.
Narsap kommuneata aningaasanik qinnuteqarnermini, Namminersornerullutik oqartussani ilaqutariinnermut pisortaqarfiup aningaasaliinissamik itigartitsinerani oqarsimapput, Narsami nukappiaqqat atornerlugaasimasut angajoqqaavisalu ornittagaat aningaasalersorneqassappat Narsap kommunea aningaasaateqarfinnut qinnuteqattariaqartoq.