Naammagittaalliuut allakkatigut tunniuppaat

Sisimiuni Siumumeersup Malik Berthelsenip taasisaasa 215-it atorunnaarsinneqarnissaat anguniarlugu partiit Siumumut illua´tungiliuttut Sisimiuni qinersinermik siulersuisunut suliakkiissuteqarput.

Malik Berthelsen ullormi qinersivimmi aatsaat paasineqarpoq, qaammatinik arfinilinnik najugaqartussaatitaaneq naammassisimanngikkaa.

Taamaammat Namminersornerullutik Oqartussani Qinersinermut Ataatsimiititaliaq aalajangerpoq, pineqartoq qinigassanngorteqqusaananilu qinerseqqusaassanngitsoq, qinersinerlu aallartereersimammat taasisaasa partiimut tunuliaqutaanut tunniunneqassasut. Atassut, Demokraatit Inuit Ataqatigiillu ataatsimoorlutik naammagittaalliuutaat tigusimallugu qinersinermik siulersuisuni siulittaasoq Hermann Berthelsen oqarpoq.

- Qinersinermit ullut 14-it qaangiutsinnagit ataatsimiissaavut, sulili ulluliinngilavut. Hermann Berthelsen oqarpoq.

Qinersinermik siulersuisuni Siumukkormiut amerlanerussuteqarput, suliarli qanoq inerneqassanersoq siulittaasup oqaaseqarfigiumanngilaa, aalajangiussanilli aamma naammagittaalliuteqartoqarsinnaanerarlugu.

Pineqartoq Malik Berthelsen Sisimiuni qinersinermik siulersuisunut aamma allagaqarpoq, qinigaasinnaanngitsutut qinersisinnaanngitsutullu nalilerneqarnini naammagittaalliutigalugit.