Inuusuttut inatsisartuisa ataatsimiinnerat Københavnimi Folketingimi ullumi aallartippoq.
Inuusuttut Danmarkimeersut nunatsinneersullu 173-it 8. klassineersut 9. klassineersullu siunnersuutit arlallit namminneq saqqummiussatik oqallisigissavaat.
Nunatsinniit atuartut marluk Sisimiuni Minngortuunnguup Atuarfia-neersut peqataapput, taakkulu siunnersuutigaat atuartut angajulliit aningaasarsiaqartinneqalissasut, atuartut angajulliit sunngiffimminni ilinniagassat suliarinagit sulisariaqartarmata.
Siunnersuutit oqaluusereerunikkit Inuusuttut Inatsisartui, ministerinut naalakkersuisuinullu apeqquteqarsinnaassapput.