Ilinniartitsisut kattuffiata Imak-p sinniisoqarfiata Ilulissani ulluni makkunani ataatsimiittup innaallagissap erngup kiassarnerullu akiisa assigiit atorunnaarsinneqarsimanerat naammaginartinnagu uparuaaffigaa.
Sinniisoqarfik isumaqarpoq assigiimmik akeqartitsijunnaarnissaq pillugu tusarniaanermi Imak-imit akissutigineqartut Inatsisartunit pisariaqarneratut naatsorsuutigineqarsimanngitsut.
Imak-ip sinniisoqarfia isumaqarpoq innaallagissap kiassarnerup erngullu assigiimmik akeqartitaajunnaarnerata nassatarisassai qulaajarniarlugit suliaq inuiaqatigiinnullu paasititsiniaaneq peqqissaarunneqarsimanngitsut.
-Taama politikkeqarneq sumiiffini akitsuiffiusuni ilinniartitsisunik atuarfinnilu pisortanik pissarsiortarnermik ajornarnerulersitsissasoq annilaanngassutigaarput, Imak-ip sinniisoqarfia taama allagaqarpoq.
Tamanna pillugu aalajangiinerup kingunissai sapinngisamik piaarnerpaamik nutaamik nalilersoqqeqqullugit Imak-ip sinniisoqarfiata Inatsisartunut kajumissaaruteqarpoq.
Ilulissani ataatsimiinnermi Imakip siulittaasuatut Sivso Dorph qinigaaqqippoq.