Pilersaarutit ingerlaannarput

Sila allanngoraluaqisoq Nuummi Aasiannilu apummik ilusilersuilluni unammisitsinerit Sisimiunilu sisoraatinik oqilaniutsitsinissarsuaq Arctic Circle Race pilersaarutigineqartut ullumi aallartinneqassapput.

Sisimiuni Arctic Circle Racemi peqataasussat 97-it ullaap tungaani nalunaaqutaq qulinut oqilaniullutik aallartissapput. Peqataasussat nunanit assigiinngitsunit qulininngaanneersuupput, soorlu Danmarkimit, Norgemit, Savalimmiunit, Sverigemit, Schweizimit, Tysklandimit, Spaniamit, Canadamit, USA-mit Nunatsinniillu aggersuullutik.

Nuummi apummik ilusilersuilluni unammisitsineq aamma ullaap tungaani nalunaaqutaq qulinut aallartissaaq, naak silap ulluni kingullerni masannartuliorluni nalornisitsilertaraluartoq. Peqataasussat holdit 15-iupput tamarmik Nuumminngaanneerlutik. Aaqqissuussisut sinnerlugit Nuuk Tourismimi pisortaaneq Flemming Nicolaisen ippassaq ima oqarpoq:

- Apummit ilusilersugassat plastikkimik qallernikuuavut, aannginnissaat neriuutigalugu. Aamma ulluni tulliuttuni silamik nalunaarut malillugu

siallissanngilaq, taamaattumik siallilissanngitsoq neriuutigiinnarparput. Flemming Nicolaisen erseqqissaavoq.

Aasianni apummik ilusilersuilluni unammisitsineq ualeru nalunaaqutaq tallimanut aamma aallartinneqassaaq.