Qinersinermik naliliisitsineq
Demokraatit partiitut nutaatut qinersisunit nuna tamakkerlugu 14 procentinik qinerneqaraluarlutik, Siumukkut Inuit Ataqatigiillu inissisimanerat innarlinngilaat. Atassutikkut Kattusseqatigiillu Demokraatinit qinersisunit tigooraapput, Atassutillu partiitut uloriarnartorsiorluinnarput.
Emma Kristensen qinersinermik naliliisoq oqarpoq, Demokraatit nutaatut saqqummeramik ajugaasutut oqaatigineqarsinnaasut aamma nutaajugamik siuariarujussuartutut oqaatigineqarsinnaasut.
- Kisianni Siumukkut Inuit Ataqatigiillu allannguuteqarujussuarsimanngitsutut isikkoqarput, naak assigiimmik akeqarunnaarsitsinerit pigaluartut, kommunillu kattussuunneqarnissaanik oqallittoqaraluartoq, oqarsinnaavugut qinersisartuninngaaniit pillagaanngitsut, Emma Kristensen oqarpoq.
Atassutikkut siornatigulli ilisimaneqarpoq nutaanik saqqummertoqaraangat qinigaanerat appartartoq, massakkullu Demokraatinut malinnaaniapiloortut Emma Kristensen ilanngullugu oqaatigaa.
- Talerperliunerusunut qinersisartut qularnanngitsumilu Atassutikkunnut qinersisartut, sumiiffeqarpianngitsumillu nangaallutik qinersisartut, Demokraatinik qinersisimanissaat naatsorsuutigineqarsinnaavoq, Emma Kristensen oqarpoq.
Tamakkiisumilli naalakkersuisuutitaqartut inissisimanerat allanngunngitsoq naliliisoq ilanngullugu oqarpoq.
Kattusseqatigiit siuttuminnik aallaaveqartumik ilisarisimaneqarnertik sanngiffigivaat, inummut ataasiinnarmut attuumatinniarneqartarnerat annertuallaarmat. Anton Frederiksen-ip tapersersorneqarnera annikilligaluttuinnassappat, soorlu siunissaqanngitsutut issasut Emma Kristensen naliliinermini naggasiivoq.