Qinersineq pissanganartoq
Nunatsinni kommunalbestyrelsemut qinersinermi inernerujumaartussat pissanngatigineqaleruttorput.
Qinersereernerup kingorna partiit akornanni suleqatigiissinnaanerit ilimagineqartut eqqartorneqalereerput.
Sisimiut kommuneani Siumut avaqqullugu Inuit Ataqatigiit Demokraatit Atassutillu imminnut suleqatigiissagunik Siumup borgmesteriutitaqarnera ulorianartorsiorsinnaavoq. Qinersinerup inernerisa takutissavaat Sisimiut kommuneani Siumut siuttuuginnassanersoq.
Nuup kommuneani Demokraatit Siumup partiianut unammillingaatsiarput. Nuup kommuneani kina borgmesterinngussanersoq pissanganarpoq, ukiorpassuarnimi borgmesteriusoq Agnethe Davidsen innuttaasunit iluarisimaarneqarluni ukiuni arlalinni Nuup kommuneani borgmestriusimavoq.
Qinersinermi uani Siumup partiia qanoq inissisimalersimassanersoq pissangagineqarnerpaanut ilaagunarpoq. Siumup partiiani qinigassanngortittut inuusuttut arlaqarput, taakkunanngalu nuimanernut ilaapput inatsisartuni ilaasortaq Doris Jakobsen aamma arpattartoq Kim Godtfredsen.
Ilulissat kommuneani Attaviittut Kattusseqatigiit ukioq kingullerli ikinnerussuteqalerlutik Anthon Frederiksen siuttuliullugu. kommunalbestyrelsemi borgmesteriutitaqarput. Siumut sinnerlugu kommunabestyrelsemut qinigassanngortittoq Palle Jeremiassen Attaviittut Kattusseqatigiinnut unammillerluni, borgmesterinngorsinnaasutut ilimagineqarpoq, qinersinerulli inerneri qanoq ikkumaarnersut takutissavaa, Siumut partiia Ilulissani siuttunngussanersoq.