Nal. tallimanut taasiartorsimasut
Nunatsinni illoqarfiit ilaanni Kommunalbestyrelsemut qinersinermi taasiartorsimasut, ukiumut 2001-mut naleqqiullugu allaanerussuteqalaarput.
Ualimut tallimanut, Sisimiuni innuttaasut affai taasiartorsimasut, taasiartorfimmi siulersuisoq Karl Berthelsen oqarpoq.
Ukiut sisamat matuma siorna Kommunimut qinersinermi taasiartorsimasut amerlanerusimapput.
Nalunaaqutaq tallimanut Sisimiuni taasisinnaasut 1817-it taasiartorsimapput.
Inuit taasiartorsimasut Sisimiuni ikinnerusimaneri silamik pissuteqarsimanavianngitsoq, taasiartorfimmi siulersuisoq Karl Berthelsen oqarpoq, taannami oqarpoq Sisimiuni ullumikkut silagissimasoq
Nuup kommuneani taasiartortartut nunatsinni illoqarfinnut allanut naleqqiullugu taasiartortartut ikinnerpaasarput, ukioq mannali tamanna allaanerussagunarpoq. Nalunaaqutaq tallimanut nuummi qinersinermi taasiartorsimasut 4432-simapput.
Qinersinermut kingullermut naleqqiullugu taasiartorsimasut 450-nik amerlanerupput.
Kommunalbestyrelsemut ilaasortassanik qinersinermi nalunaaqutaq tallimanut qinersivimmi Tasiilami innuttaasut 49,18 procentii taasiartoreersimapput.
Tasiilami taasiartorfimmi siulersuisoq Johannes Kalia oqarpoq taasiartorsimasut amerlassusaat ukioq 2001-mut naleqqiullugu allaanerunngitsoq. Tasiilami innuttaasut 60 procentiisa missai qinersinermi taasiartorumaartut ilimagaa.
Nalunaaqutaq tallimanut Qaqortumi innuttaasut 60 procentii taasiartorsimapput. 2001-mut naleqqiullugu taasiartorsimasut 5 procentit missaanik ikinnerupput. Taasivimmi nakkutilliisoq Kim Dahl oqarpoq, taasivissanut atatillugu inuit isigiarsuttut arlallit ikiortariaqarsimasut. Qaqortup kommuniani qinersinermi taasiartortussat ukioq manna ikinnerunissaat Kim Dahl-ip ilimagaa.
Ilulissani innuttaasut taasiartorsimasut nalunaaqutaq tallimanut 2084-siusimasut tasisitsivimmi siulersuisoq Katrine Rosbach oqarpoq. Ukioq 2001-mi kisitsisinik naleqqiussassaasinnaasunik tigummiaqannginnerarmat oqaatigineqarsinnaanngilaq Ilulissani innuttaasut taasiartorsimasut amerlanerunersut ikinnerunersulluunniit.
Kommunimut qinersinermi inernerit KNR TV-kut malinnaaffigineqalissapput nalunaaqutaq arfineq pingasunut.