Siumut unammillerpaat
Uummannami kommunalbestyrelsemi ilaasortaareersut, tamarluinnarmik Siumut partiianneersuusut unammillerneqartariaqartut Atassut sinnerlugu kommunalbestyrelsemut qinigassanngortittoq oqarpoq.
Uummannap illoqarfiani inuit Ukiuni kingullerni tallimani 250-it missaannik ikilisimapput, suliffiusinnaasullu ikiliartuinnarlutik, ilaatigut akunnittarfimmi suliffisat 20-nik ikilisimapput.
Siumup partiiata unammillerneqannginnera Uummannap illoqarfiata ineriartornissaanik unittoortitsisoq, Atassut sinnerlugu qinigassanngortittoq Karl Markussen isumaqarpoq.
- Pingaartumik ukiut kingulliit sisamat tunumut qiviassagaanni, illoqarfitsinni pissutsit naammagiunnarpagut. Suliffeqarfinnut kommunip illuatungiliuttutut kiinnertarnera naammagiunnaarsimavarput. Kommuni innuttaasut piumasaanut illuatungiliuttunngorsimasoq, allaat illoqarfiup uummataani tassa suliffissuarimi sulisut suliffissaarunneranni pikkorissartuarnissaasa ingerlannissaat pisimanngitsoq, Karl Markussen Uummannami Atassut sinnerlugu kommunalbestyrelsemut qinigassanngortittoq oqarpoq.
Atassutip partiia ukiuni arlalinni Uummannami ingerlasimanngeriarluni, qaammatit marluk matuma siorna Atassutip partiia pilersinneqaqqippoq.