Nanortallip Kommuneani eqqartuussisoqannginnera pissutigalugu, suliassat uninngatiinnarneqartarput. Nanortallip Kommunea Narsap Qaqortullu kommuniinut qangalili eqqartuussisussarsiortariaqartarsimavoq, Nanortallip Kommuneani isumaginninnermut ataatsimiititaliamut artukkersuutaasumik. Ataatsimiititaliami siulittaasoq Kristine Raahauge ima oqarpoq: - Meeqqamik innarliisimasup piaarnerpaamik pillarneqarneqarnissaa kissaatiginartaraluarpoq, kisianni tassa illoqarfitsinni allaat ilaqutariit avissaartittariaqarsinnaasarpagut, eqqartuussisoqannginnerput pissutigalugu innarliisimasumik pillaasinnaannginnatta. Suliniarnitsinni tamakku aamma aporfiusarput, Nanortallip Kommuneani isumaginninnermut ataatsimiititaliap siulittaasua Kristine Raahauge oqarpoq.
Narsap Kommuneani eqqartuussisup Kista Høeghip ilisimatitsissutigaa januaarimili napparsimasimalluni, taamaammallu Nanortaliliarsinnaasimanani. Sapaatip akunnerata tulliani allatsini ilagalugu Nanortaliliassamaarnerarpoq, suliassarpassuillu naammassiartussallugit. Kista Høegh allattaalu sapaatit akunnerini pingasuni Nanortalimmiissapput.
