Qeqertarsuarmi nuna sajuttoq
31. marts 2005 07:45
Ippassaq Qeqertarsuarmi nuna sajussimasoq politiinit oqaatigineqarpoq.
Stationslederi Jens Mølgaard oqarpoq nunap sajunnera nal. 13.45 pisimasoq.
- Nipi qaarpalunneq sakkortooq tusaavarput, politeeqarfillu sekundit qulit miss. sajullatsiarpoq, stationslederi oqarpoq.
Aallaqqaammut politiit isumaqarsimagaluarput qaartartumik qaartoqarsimasoq. Nunap sajussimanera inunnik ajoqusiisimanngitsoq politinit oqaatigineqarpoq.
Innuttaasut arlallit nunap sajunnera politiinut saaffiginnissutigisimavaat.
GEUS-ip (Danmarkip Kalaallillu Nunaata ujarassiooqarfia) uppernarsarsinnaannginnerarpaa nunap sajussimanera.
- Nuna sajussimasinnaavoq, siornatigummi Qeqertarsuarmi nuna sajuttarnikuuvoq, GEUS-imi professori Søren Gregersen oqarpoq.