Kunngissaq tikilerpoq

30. marts 2005 06:56

Sapaatip akunnera qaangiuppat kunngissaq Frederik nunatsinnut tikissaaq, Jørgen Brønlundip, Mylius Erichsen-ip Høegh Hagen-illu 1906-miit 8-mut Tunup avannaarsuani qimussimik ilisimasassarsiornerminni aqqutigisimasaatigut qimussernissarsuarmut peqataajartorluni. Qimussimik ingerlaarnissaq Danmarksradiop TV-kkut aallakaatitassiarissavaa.

1906-imi 8-imilu ilisimasassarsiorneq tusagassiortumit atuakkiortumillu Mylius Erichsen-imit siuttuuffigineqarsimavoq. Ilisimasassarsiornermilu tassani Mylius Erichsen Høegh Hagen aamma Jørgen Brønlund tamarmik ajunaarput.

Kunngissaq Kangerlussuarmut ataasinngorpat tikissaaq, tassaangaanniit Tunumi Mestersvig-imut nerlerilluunniit inaanut ingerlaqqissalluni. Tunup avannaarsuani TV-liortussat ornitassarai.

Kunngissap apriilip 13-iata tungaanut qimusseqataanissaa pilersaarutaavoq.

Danmarsradiop TV-liortussai kalaallillu qimussertussat Tunup avannaani 900 kilometerinik ingerlaarnissamut maanna piareersaleruttorput. Qimussernermit aallakaatitassiassat arfineq pingasuusussat, Mylius Erichsen-ikkut ukiut 100-it matuma siornagut angalasimanerat aappaagu nalliussineqarpat aallakaatinneqartussaassapput.

Hvis du har fundet en fejl i artiklen, kan du skrive til os her.

Læs også