Ilulissani suliffissuup ruujoria piareerpoq

Royal Greenlandip Ilulissani suliffisuata qaleralinnik tunisassiornini uniteriarlugu, sulisut 50-t sapaatip akunnerata siulianili suliunnaarallarsippai.

Tunisassiorunnaarallarnermut pissutaavoq ruujorip milittoornera. Avatangiisinut pisortaqarfik, Ilulissanilu kommunip teknikkeqarfiata Royal Greenlandi iliuuseqapallattariaqartoq piumasaraat.

Ilulissat umiarsualiviani ruujori maanna ammarsarneqareerluni, ajoqutaalu iluarsarneqareerluni piareertoq suliffissuup pisortaa Sharhriar Bordbar radioaviisimut oqarpoq.

Sulisut 50-t suliunnaarallartitat suli sulilersinneqaqinngillat. Qaleralinnilli tulaassanik qerititsiortuineq ingerlaannarpoq.

Suliffissuullu pisortaata oqaatigaa sulisut 25-t 40-llu akornaniittut ullut 14-nit qaangiuppata sulilersinneqaqqissasut.

Royal Greenlandip pisortaa Henrik Leth radioaviisimut oqarpoq Ilulissat kommuniat iliuussissamik oqaloqatigineqarsimasoq, sulilu kommunep siunnersuutissaa utaqqiinnarneqartoq.