Attartortunut allannguuteqassanngilaq

Inissiat INI A/S aqqutigalugu attartortinneqartut 1250-it, Nuup kommuneata aappaagu allaffissornertaat tigummisareqqilerpagit attartortunut allannguuteqartitsinavianngitsoq, Nuup Kommuneani inissianut tunngasunik siunnersorti Erik Ravn oqarpoq.

- Attartortunut allannguuteqartoqarnavianngilaq, inigisamut akiliisarnerit inissiamillu attartornermut inatsisaareersut atuutiinnartussaapput, Nuup kommuneani inissianut tunngasunik siunnersorti Erik Ravn oqarpoq nangillunilu;- Inisiat 1250-it Nuup kommuneata tigoqqippagit inissarsiortutut allattorsimasuniinnermut attuinavianngilaq. Inissarsiortutut allatsiffissat marluussapput, tassa INI A/S aamma Nuup kommunea, maannakkorpiarlu INI A/S-lu isumaqatiginniutigaarput inissarsiortutut utaqqisuniittut allatseqqittarnissaat qanorpiaq pissanersoq. Aamma inissamik utaqqisarnissap sivisunerulernissaa ilimananngilaq, Erik Ravn oqarpoq.

Nuup kommuneata inissiat 1250-it tigoqqippagit inissiaatileqatigiiffimmik aktieselskabiusumik pilersitsisoqassaaq, tassanilu ilaasortaasussat Nuup kommunalbestyrelseanit toqqarneqassasut Erik Ravn oqarpoq.

Nuup kommuneani INI A/S-ip ingerlatsisimanera kommunalbestyrelsemit naammagineqarsimanngilaq, taamaammat Nuup kommunalbestyrelseata inissiat 1250-it tigusussanngorpai Erik Ravn naggasiivoq.

Inissiat Nuup kommuneanit tigummisarilerneqartussat tassaassapput inissiat Nuussuarmiittut, Qernertunnguaniittut, Paarnaniittut Fiskerbymiittullu.

INI A/S-ip kommunillu akunneranni isumaqatigiissutit ukioq naappat atorunnaassapput, taamaalippat illuutileqatigiiffiup nutaap inissiat aqutarilertussaallugit.