Partiit aningaasalisui ammaateqquaat

Inatsisartuni qaammatip tulliani ataatsimiittoqalerpat Demokraatit siunnersutiginiarpaat aningaasanik tapiissutit partiit naatsorsuutaanni tamanut saqqummiunneqartalissasut. Tamanna inatsisitigut piumasarineqartalissasoq Demokraatit siulittaasuata Per Berthelsenip siunnersuutiginiarpaa.

Aammattaaq isumaqarpoq partiit naalakkersuinermi oqartussaanertik atorlugu suliffeqarfissuarnut, soorlu Namminersornerullutik Oqartussanit pigineqartunit pingitsaalillutik partiit amigartoorutaannut ikiuisannginnissaat piniarlugu taama siunnersuuteqarluni.

Per Berthelsen oqarpoq kikkulluunniit 10.000 kr.-t angullugit partiinut tunisisut nalunaarsorneqartalissasut inatsisissami siunnersutigigitsik.

Demokraatit kimilluunniit aningaasartigut tapersersorneqannginnerarpai, taamaallaalli partiit landskarsimit aningaasanik "milluaanerat" unitsinneqassasoq siunnersuutigiinnaritsik.

Per Berthelsen isumaqarpoq landskarsimit partiit aningaasanik pissarsisussanngoraangata kukkunersiuisut naatsorsuutinik piumasaqartarnerat naammanngitsoq.

Siunnersuutip allassimasortaa takusimatinnagu, Siumup Atassutillu inatsisartuni oqaaseqartitaasa oqaaseqarfigerusunngikkallaarpaat.