Maniitsormiut nuummiullu ilimasuffigineqarput

Volleyball-imik unammersuarnerit Maniitsumi aqagu aallartissapput, siornalu arnani pissartaasut AVI Maniitsumeersut angutinilu GSS Nuummeersut pissartanngoqqinnissaat ilimagineqarpoq.

Unammersuaarnerit aallartippata arnani hold-it tallimat peqataassapput, angutinilu hold-it arfinillit. Hold-it peqataasussat tassaapput AVI Maniitsumeersut, GSS Nuummeersut, IVK Ilulissaneersut, QVP Qaqortumeersut kiisalu TVK Tasiilameersut. Angutini KT-VI Kangaamiuneersut aamma peqataassapput.

Kalaallit Nunaanni Volleyball-ertartut Katuffianni KVK-mi siulittaasoq Aalipaaraq Kreutzmann Maniitsumeersoq oqarpoq, siorna arnani pissartaasut AVI pissartanngoqqinnissaminnut ilimanaateqarluartut angutinilu aamma pissartaasut GSS aamma pissartanngornissaminnut ilimanaateqarluarsinnaasut.

- Ilimanarporngaasiit arnani AVI aamma GSS finalimi unamminissaat. Angutinilu siorna pissartaasut GSS, apeqqutaalluni kikkut unammissaneraat, AVI imaluunniit KT-VI IVK-luunniit finalimi naapissinnaapput, Aalipaaraq Kreutzmann oqarpoq.

Maniitsumi unammersuaarnerit arfininngorpat naammassissapput.