Umiatsiaararsorlutik aalisartut marsip aallaqqaataa nallerpat akunnattoorfeqalissapput. Ullormi tassani mitit piniagaajunnaassapput.
- Kisianni mitinik pisaqartuaannarpugut, umiatsiaararsortut peqatigiiffianni siulittaasoq Karl Lyberth oqarpoq.
Arnarlunniartoqartillugu mitit qassutini pisarisoorneqartuaannangajattut Karl Lyberth oqarpoq.
- Mitit pisariniarneq ajorpagut, kisianni pisarisoortuaannangajappagut, Karl Lyberth nassuiaavoq, nangillunilu: - Taamatut pisaqartoortarnerput mitit amerlassusaanut ikilisaataanngilaq.
Tamanna pissutigalugu Maniitsumi umiatsiaararsortut sinnerlugit Karl Lyberth Aalisarnermut Naalakkersuisoq Rasmus Frederiksen allaffigaa qinnutigalugu miterniarnerup marsip aallaqqaatani unitsinnagu maajip aallaqqaataata tungaanut sivitsoqqullugu.
Taamaalinikkut saniatigut pisat tunisinnaassavaat. Ullumikkut mitit allanut tunniuttarpaat imaluunniit nammineq nerisarlugit. Kisianni mitit pisarineqartartut amerlangaarmata tunigusuttalerusuppaat.
Saniatigut taateraarniarneq sivitsorneqarnissaa qinnutigineqarpoq, maajip aallaqqaataata tungaanut sivitsoqqullugu.
Sapaatip akunnerata tulliani Aalisarnermut Naalakkersuisumit Rasmus Frederiksenimit akissutisisinnaanissartik umiatsiaararsortut neriuutigaat.
Rasmus Frederiksen raatiuaviisimut oqarpoq allagaq suli takusimanagu, neriorsuutigaluguli uterfigeqqikkumaarluta.