Takornariat pillugit kisitsisit GT-p upperinngilai

Takornariat tikittartut pillugit Kalaallit Nunaanni Naatsorsueqqissaartarfiup inerniliisimanera, takornariat 2004-mi siornaammut naleqqiullugit 6,1 %-imik amerleriarsimanerannik inerniliisimanera, Greenland Tourismimit upperineqanngilaq.

- Sinerissami takornariartitsiviit naatsorsuinerat naapertorlugu amerlanerupput, allaat sumiiffiit ilaanni 10%-imit 40 %-it angullugit amerleriaateqarsimapput. Taamaattumik Naatsorsueqqissaartarfiup saqqummiussai upperivallaanngilavut. Greenland Tourismimi inerisaanermik pisortaagallartoq Mads Daniel Skifte tunngavilersuivoq.

Kisitseriaatsit erseqqissumik takutitsinissamut ajornakusoortitsisinnaanerat Greenland Tourismip erseqqissaatigaa, kisitsisit uppernavissut pissarsiarineqarsinnaanatik.

- Taamaammat apriilip qulingani ataatsimeeqatiserinnippugut, tassanilu Naatsorsueqqissaartarfik, Inuussutissarsiornermut Pisortaqarfik Air Greenlandilu ataatsimeeqatigissallutigik. Mads Daniel Skifte nassuiaavoq.

Aammali takornariat tamarmik nalunaaruteqanngitsoortarnerat kiisalu sineriatsinni takornariartitsiviit tamarmik nalunaarusiorneq ajornerat kisitsisinik erseqqinnerusunik takussutissiinissamut ajornartorsiortitsisartoq erseqqissaatigineqarpoq.

Ammassalimmi takornariaqarnermut pisortaq Anders Steenbakken tapersiilluni oqarpoq, takornariat tamakkiisumik isigalugit, Naatsorsueqqissaartarfiup naatsorsuineratut Tasiilamut 1.200-it sinnilaarlugit amerlassuseqarsimanngitsut, 6.000-illi tikissimanissaat naatsorsorsimallugu.