H.C. Andersen-ambassadøri nittarsaassiniarpoq

Danmarkimi H. C. Andersenip inunngorneraniit ukiut 200-nngortorsiorneqarnerannut atatillugu nunarsuaq tamakkerlugu H.C. Andersenip ambassadøriinik, tassa aallartitaanik toqqaasoqaqattaarpoq.

Nunatsinniillu toqqarneqarpoq filmiliortartoq titartaasartorlu Kunuk Platou.

Kunuk Platou Kultureqarnermut Naalakkersuisumit Henriette Rasmussen-imit piukkunneqarnerminut akuersisimavoq, pisortatigoortumillu H. C. Andersenip ambassadøriatut ullumi toqqarneqarpoq.

- Toqqarneqarnissara naatsorsuutiginngikkaluarakku, sivikitsumillu eqqarsaatigereerlugu akuersivunga. Kunuk Platou oqarpoq.

Kunuk Platou H.C. Andersenillu ambassadørii nunani assigiinngitsuneersut, apriilip pingajuani H.C. Andsersenip inunngorfiani Odensemi katersuutissapput.

- Neriuppunga nunarput aamma nittarsaalluarsinnaassallugu. Kunuk Platou nassuiaavoq.

H.C. Andersenip oqaluttualiaa ”Kaasarip atisartaavi” Ilulissani kulturip illorsuani Sermermiuni takutitassatut Kunuk Platoup maanna isiginnaartitsissusiaraa.