Takornariat amerliartortut
Nunatsinnut siorna 2004-imi takornariat amerleriarsimapput, siornaak 2003-imut naleqqiullutik 1.812-inik amerleriarsimallutik, taama Nunatsinni Naatsorsueqqissaartarfik nalunaarpoq.
Siorna 2004-mi nunatsinnut takornariartut katillutik 31.524-iusimapput.
Nunatsinni ornitassani Tunumut takornariat sinerissami ornitassanut allanut naleqqiullutik amerleriarnerpaasimapput, siornaak Tunumut takornariat 729-isoriarlutik siorna 1.265-iusimapput.
Kitaanuttaaq takornariat 2 procentit 3 procentillu akornanni amerleriarsimapput.
Takornariartartuttaaq ukioqqortusiartorput, tassa agguaqatigiissillugu 44-nik ukiullit tikittartut ukiumik ataatsimik ukioqqortunerulersimallutik.
Takornariat nunatsinniittarnerat 2003-mut naleqqiulluni ullormik ataatsimik aamma ilasimavoq, tassa takornariat agguaqatigiissillugu ulluni 14-ini nunatsinniinnerusartut, Naatsorsueqqissaartarfiup naatsorsuusiaani saqqummiunneqarpoq. Nunatsinni aasaanerani takornariaqarnerpaajusarnera nikissimanngilaq.