Ilimmarfik sanallugu aallartissinnaanngorpoq

Maanna aalajangerneqarsimalerpoq suliffeqarfiit sorliit Ilimmarfimmik Nuumiittussami sanasuussanersut.

Suliffeqarfiit tallimat suliariumannittarsiuussinermi ajugaasut, ippassaq Namminersornerullutik Oqartussat atsioqatigaat. Taama ilisimatitsivoq Ineqarnermut Attaveqarnermullu Pisortaqarfimmi allaffimmi pisortaq, Rasmus P. Foged.

Suliffeqarfik Larsen & Co. qaartiterisuullunilu nunagissaassuusaaq, Permagreen Grønland-ilu betonilerinermi suliaqartuussalluni.

Atortunik ikkusuisuusaaq Brøndum Grønland, sanasuussallunilu Pihl & Søn. Kiisalu Arsarnerit kallerup inneranut tunngasunik suliaqartuussalluni.

Rasmus P. Foged oqaluttuarpoq piffissamik pilersaarusioreersimallutik, tamannalu isumaqarpoq pilersaarutit malillugit suliamik aallarnisaanerit apriil-ip 18-ani aallartissasut. Naatsorsuutigisamik pilersaarutit malillugit tamarmik ingerlassappata Ilimmarfik ukiup aappaa affaa qaangiuppat naammassereersimassaaq, tassa oktobarip 16-ani 2007-mi.