Qinigassanngortittut affaat nunaqarfinniit

Kangaatsiami kommunalbestyrelsimi inissat 7-t qinigassanngortittunit 40-nit pilerngunneqassapput. Taakkunannga arnat 7-iinnaapput.

Ilaasortat amerlanersaat sassaqqipput, politikimi misilittagarnersaat, Atassummeersoq Jens Inuusuttoq, ukiuni 25-ni politikimik suliaqareerluni tunuartussanngortoq kisimi sassaqqissanani.

Atassut 13-nik qinigassanngortitaqarpoq, taakkununnga ilaallutik massakku ilaasortaasoq Karl Petersen kiisalu Gabriel Haggæussen, siornatigut IA sinnerlugu ilaasortaasarsimasoq.

Siumup sassartitai 15-iupput, borgmesteri Otto Jeremiassen, qinigaaffiup matuma ingerlanerani Atassummiit nuuttoq, sassaqataasalu ilagaat Siumup immikkoortortaani siulittaasoq Jakob Ludvigsen kiisalu Siumup siulittaasussaattut qanittukkut sassaraluartoq Godmand Petersen.

Inuit Ataqatigit Kangaatsiami sassartitaat 11-upput, massakkut ilaasortaasut, Anthon Petersen Hans Siegstadilu sassaqqillutik.

Demokraatit Kangaatsiami sassartitaqanngillat, Kattusseqatigiilli 2-nik sassartitaqarput, massakkut ilaasortaasoq Villy Olsvig qinigassanngorteqqilluni.

Kangaatsiaq 4-nik nunaqarfeqarpoq, qinigassanngortittullu affaat sinnerlugit taakkunaniit qinigassanngortipput.